قصيدة غنائية فمان الله

 

فمــــان الله ياحــبٍ رحـــل وتوه مبتـــدي

رحــل والقلب مــن عقبـه تزايد في علاعيله

صــدمت القلب في حب جـديدٍ توّه مولـدي

وخـلى عبـــرةٍ بالصــدر تخفي مــا يعانيـله

طواني البعد والذكرى سهرها صار سرمـدي

على منهــو نقش رسمــه بقلبي في مواويله

هوى نجم الغرام وصار نوره عندي مخمدي

وظــلام الهـم في روحي تمـدد في تعاليــله

عسى عقب الفراق اللي كواني يبكي لوجدي

يعوضــني كـريم الجود ترى ماعاد لي حيله

أنا الضعيف المشتـكي لله طبي وسعــــدي

على وقتٍ كـواني بجـور بعده مع غــرابيله

الشاعر / 

فهد بن عبدالله الروضان التميمي

سناب شات: f515f@