مــرات يا نعــم الفخــر
يا راكب اللي مـا ضـــرا بالتمـــاليل
جمسٍ على قطـع الفيــافي ضـــرايا
منصــاه ديرة شامخــة كأنها سهيل
مــرات يا نعــم الفخــر والمــــزايا
من عصـر جاهل ولتواريخ تسجيـل
فيهــا كميت المعتلي في السمــايا
ضلعٍ رسى ما حــركته المخــــاييل
يحكي صمــود أجيالنـا والنحــــايا
ديرة مــرات أهــل الوفا والمعـاليل
بيوتهــم للضيف دايم نحــــــــايا
ترحيبهــم يسبق دلال المعــــاميل
الضيف يلقـى لــه حفـاوة هـــــلايا
ويا ما حـــلا الجفــره غدير وتظليل
بين الأثل والمــا قـــراحٍ صفـــــايا
والمجلس اللي عقب ذيك التعاديل
يجــذب سياحٍ مــن بعيــد وقــرايا
ولمهرجان التمر وأهل المحــاصيل
وســــباق دراجـــة بفن وهـــــوايا
وشــتا مــرات اللي يزيل التمـــاليل
يجمــع هـل الــديره وأهـــل الثنايا
وفي برّهــا روضٍ نـشت لـه مخاييل
نفــودهــا كنّــه زباد الشــــــــفايا
فيهـا الرياض اللي غشاها الهماليل
ريح النفــل والشيـــح مسك الزوايا
ديرة أدب يجني الفكر له محــاصيل
تاريخهــا شعـــرٍ يهـــزّ الحنـــــايا
شعــارها صاغــوا قـــوافي مظاليل
جــزل المعــاني من قــديم البرايا
أفخر بها وأرفـع لـها القـول تفصـيل
ديرة هـل الـطـولات دار الســنـايـا
الشاعر /
فهد بن عبدالله الروضان التميمي
تعليقات
إرسال تعليق