مجاراة شعرية ابو عبدالرحمن اليوسف
هجـدتني وأقـول يا اللّٰه عسى خير
صبحــتني وأقـــول يا عــل خــيره
وش بك على قلب كفخ كنه الطـير
ما ترحمـه يومـه كفـخ في مطيــره
خليت في صدري سوات المعاصير
وضلوع صــدري عصــرته تعصيره
أرفق علي يا ابو عيـونن سـواحــير
الروح من نظــرة عيـونك سحــيره
اسهــرتني واودعت فيني مسـامير
لا واهـــني القلب لـو نك سمــيره
متى يصـير الحلـم علـم وتياســير
ويرتاح جسـمي في نهــاية مسـيره
الشاعر
عبدالله بن عبدالرحمن اليوسف التميمي
مجاراة من الشاعر ——————
جاني صبـاح اليـوم يالله عسى خير
مكتـوب راعي القاف خافي سـريره
امنــولٍ يوم الغطاء حــاكم البيـر
محدٍ سمع صوت الشخيب وهديره
حــنا بشـر تلــفي علينـا معـاسيـر
وبعــد العسر لا بد ياتي يسيـــــره
والعشق ماهـو عيب له حق تقدير
لا بــد مــن شيٍ يجيـــه ويثـــــره
والعشق ما يعـرف كبار ومصـاغير
لاحــل في قلبٍ صفـــاله عبيــــرة
مايقهــــره إلا كثيـــر المعــــاذير
يغبش عليـه من الهمـوم الكثيــره
ياللي شكيت من العيون السواحير
ارفق على قلبٍ تزيــده حســـيره
الشاعر
فهد بن عبدالله الروضان التميمي
الاثنين 2025/10/27م
تعليقات
إرسال تعليق