اخذت من الحياة دروس

 

أخـذت مـن الحـياة دْروس لَفَّتْ بي سبـع لفَّات

أدور أبهَــا وأصــارعــها حــماني الله وحَـــيَّابَه

غريب ذا الزمــان اللي يلاطمْـنا غَــدِر و إسكات

أثرنا في زمــانٍ أغبــرْ عجـاجُــه هَبّ مـن تافِـه

تَرَى بعــض البشـر عاهة كـرِيه وِلْلِنْذل عاهات

عــاهــاتٍ خلقــها الله في الــدنيا مـن ترابـــه

ولا تَامَــنْ رَدِيَّ الأصــل فِلْخُــوَّة مـن الميــلات

كــلام الزين بالســانه وقلبُــه يخــفي حِــرابَه

ولا تَامَـنْ رَدِيَّ النفـس والهَقْــوَات والْقُــومَات

يجيــك بنيـاب تنسـل سَـمّ ومـا حــدٍ خـافَــه

تحسبه من خِيَار الناس وذِكْره من هَلْ الهامات

وهــو أنجس عبــاد الله مـن راسـه إلى ساسـه

حقيقة بعض من نِحْسِبْ لهم قدرٍ وطيب الذات

وقولة "والنعم" عنـدك على لسانك من أوصافه

تحسبـه راعي النَّخْـوَة وهو عُومَة مـن العُومَات

اثر بعض البشــر ليمــن تروِّزه تعـرف أصنـافـه

كثيـر الهـرج والحَلْفَــان يدور وياخـذك لَفَّـات

مِجَنِّبْ صــدقَه لسـانه ويخفي صـدرُه جِحافَه

يغيظُـه لا صَـدَح علمك بين النـاس والقـامات

رِدِيَّاتٍ فيــه من صغــره حقـود نفســه تِعافَه

وهـو يفرَح إلى شافك ضعيف وصابتك طَمَّات

إلى تاحت لــه الفرصة سَكَبْ من سَمِّه أزْعافَه

طعونٍ جَمَّــة لسانه كما الواشي أو الشَّمَّــات

صَــدَى تأثير هالتَّــافِه يصــدّقها لـه التافِــه

الشاعر/

فهد بن عبدالله الروضان التميمي

2024/10/15م