مجاراتي للشاعر خالد الفايز التميمي
مجاراتي للشاعر الجزل خالد الفايز التميمي
(أبا عبدالعزيز)؛ رداً على أبياته الصادقة التي فاضت بالحكمة وعزة النفس، وصورت لنا شموخ الصبر في وجه تقلبات الأيام، أقول فيها
يقول
يالوقت ظرفك يصارعني ويختالي
دنياي قفت وانا اجاهد مصاعبها
ماعـدت اميز مابين المر والحالي
واضن قلبي ولف سطوة مضاربها
والله مابكي قهر كان البخت مالي
و ربي هـو اللي موريني عجـايبها
مابديت سدي على عمٍ ولا خالي
رغم الظروف الثقال اللي أمربها
أشكي لك الحال يا عالم بغربالي
ياللي لك الخلق رافعـة ٍ مناكبها
جعلك تحقّق مطاليبٍ على بالي
احترت فيها وانا فـكري يقلبها
وختامها الحمدلله والسعد فالي
مـادم رب العباد اللي يحـاسبها
الشاعر /
خالد الفايز ( ابو عبدالعزيز )
الأربعاء: 6 مايو 2026م
يا مرحـبا والتحـايا قـدرهــا عالي
بأبيات شاعر يجيد بسبك جـاذبها
يا خــالـد الوقت لو يقفي ويقبالي
تبقى العــزايم عسيـراتٍ مراكبـها
والحر مثلك يشيل الحمل ويشالي
نفسـه تعيف الهـوان ولا تصاحبها
دامك تميمي وفعلك يتعب القالي
اصبـر على جـور بقعا مـع عقاربها
ما ينكسر كـود من فكره به خبالي
والا أنت تـرسي والاريـاح تلاعبهــا
الضيق يفـرج بأمـر الواحد العالي
من يركب الخيل يعرف كيف يدبها
عسى الولي يستجيب لكل الآمالي
ونفوسنا بالسعـد يروي شعايبهـا
الشاعر /
فهد بن عبدالله الروضان التميمي
الأربعاء: 6 مايو 2026م
تعليقات
إرسال تعليق